ශ්‍රී ලාංකීය ජනතාව අතර ගණදෙවියන් ගෞරවයටත් වන්දනාමානයටත් පාත්‍රව ඇත්තේ නැණ නුවණ පමණක්‌ ලබා දෙන්නා වූ දෙවි කෙනෙකු ලෙස වුවත් එතුමන් නැණ නුවණ පමණක්‌ නොව සියලු යස ඉසුරු ලබාදෙන සුවිශේෂී දේවාත්මයකි. සකල ලෝකවාසී ජනතාවගේ විවිධාකාර වූ ගැටලු නිරාකරණය කරදීම පිණිස ඒ ඒ අවස්‌ථාවට අනුව විවිධ මූර්තීන්ගෙන් ලොව පහළ වීමට තරම් බලසම්පන්න ගණදෙවිඳුන් වැඳ පුදා පිං අනුමෝදන් කර භක්‌තිමත්ව කන්නලව් කිරීම තුළ උන්වහන්සේගේ පිහිට ආරක්‍ෂාව නිරතුරුවම ඔබ වෙත ළඟාකර ගත හැකිය.
උතුම් වූ ගණේෂ නම් නාමෝපලක්‌ෂිත දිව්‍ය රාජයාණන් වහන්ස අති පාරිශුද්ධ ශුභ්‍ර වර්ණයෙන් මුළු ශ්‍රී ලංකා ධරණිතලයම ඒකාලෝක කරමින් දස දිගත කීර්ති ධාරා පතුරුවමින් වැඩ වසන්නාවූ “හස්‌ති පෝතක” සුන්දර ඡත්‍රයකින් යුතුව මහා කරුණා මූර්තියෙන් ලොව පහළ වී සෘෂි ප්‍රවෘජ්‍යාවෙන් හේමකූඨය නම් ගිරි ශිඛරය පාමුල වැඩ වසන්නා වූ ඔබ වහන්සේට වැඳ නමස්‌කාර කොට ක්‌ෂීර පායාසයෙන් යුක්‌ත වූ බත් භෝජන, කැවිලි සහිත පලතුරු පූජාවන් පවත්වා මලින්, පහනින්, සුවඳ දුම් ආදියෙන් නොඅඩුව කර්ණ රසායන වාද්‍ය වෘන්ද සහිත භේරි වාදනයෙන් යුතු නාද පූජාවක්‌ පවත්වා මේ ආතුර ශ්‍රී පාත්‍රයන් විසින් ඔබ වහන්සේගේ දෙපා පියුම් මත බැතිබරව වැඳ වැටී සැළකර සිටින මේ කන්නලව්ව දිව නෙතින් දැක දිව කනින් අසා ඔවුනට ඉෂ්ටාර්ථ සිද්ධිය සලසා දී වදාරන සේක්‌වා·
තවද ඔබ වහන්සේ සුර, බඹ, නර සියලු ලෝකවාසීන්ට නැණ නුවණ දෙමින් සකල ඓශ්චර්යයත්, සර්ව සෞභාග්‍යයත් ළඟාකර දෙමින් මෙම කලියුග වර්ෂය තුළ මහාගණේෂ නම් මූර්තියෙන් ලොව පහළ වී යන්ත්‍ර මන්ත්‍ර තන්ත්‍රාදී සියලු ශාස්‌ත්‍රයනට අධිපතිව කාර්ය සිද්ධිය සලසමින් අනවින කොඩිවින, අංගං පිල්ලි, සූනියම්, ක්‍රේම බන්ධන, සියලු වින දොස්‌ විද්වංශනය කරමින් වස්‌දොස්‌ නිවාරණය කරමින් ශාන්තිය දානය කරන බැව් සත්‍යවාදී සැබෑ වී නම්,
වල්ලභ ගණේෂ මූර්තියෙන් ලොව පහළ වී සියලු පෙම්වත් යුවති පතිනට සර්වාරක්‌ෂාව සලසා දෙමින් සැප සම්පත් දානය කර දෙන බැව් සත්‍යවාදී සැබෑ වී නම්,
බාල ගණේෂ නම් මූර්තියෙන් ලොව පහළව සකල ලෝකවාසී සියලු බිළිඳුන්ගේ සියලු වස්‌දොස්‌ නිවාරණය කොට සෞඛ්‍ය සම්පත්තිය දානය කරමින් ද ලෝකවාසී සියලු සත්ත්වයන්ගේ අභිවෘද්ධිය පිණිස දරුඵල දානය කරමින්ද ශාන්තිය දානය කරන බව සත්‍යවාදී සැබෑ වී නම්,
වීර ගණේෂ මූර්තියෙන් ලොව හළ වී අසාධාරණයට අයුක්‌තියට එරෙහිව සාධු ජනයා සුරක්‍ෂිත කරමින් සතුරන් නසා සාධු ජනයාට චිර ජීවනය දානය කරන බැව් සත්‍යවාදී සැබෑ වී නම්,
හේරම්භ ගණේෂ මූර්තියෙන් ලොව පහළ වී නිසි කලට අව් වැසි ලබා දී ශෂ්‍ය සම්පත, ගව සම්පත ආරක්‍ෂා කොට දී ලෝවාසීනට සශ්‍රීකත්වය දානය කරන බැව් සත්‍යවාදී සැබෑ වී නම්,
මෙම කලියුග වර්ෂයට ශක්‌ති ගණේෂ මූර්තියෙන් ලොව පහළ වී සකල ලෝක සත්ත්වයාගේ සියලු රෝග දුක්‌ විද්වංශනය කොට නිරෝගී සම්පත්තිය දානය කරන බැව් සත්‍යවාදී සැබෑ වී නම්,
ධරණි ගණේෂ මූර්තියෙන් ලොව පහළ වී සියලු පොළෝ බහිරවයන්ට නායකව පොළෝ ගැබ තුළ සැඟ වී ඇත්තා වූ මුතු මැණික්‌ ආදී සියලු සම්පත් සාධු ජනයා වෙත දානය කරමින් භූමි දොaෂ නිවාරණය කරන බැව් සත්‍යවාදී සැබෑ වී නම්,
සිද්ධි ගණේෂ මූර්තියෙන් ලොව පහළ වී වස්‌තු සම්පත භූමි සම්පත, ධන සම්පත, ධාන්‍ය සම්පත, සත්ත්ව සම්පත, ස්‌ත්‍රී සම්පත, දරු සම්පත ආදී සම්පත්තිය ලෝකවාසීනට දානය කොට සාධු ජනයා සුරකින බව සැබෑ වී නම්,
බුද්ධි ගණේෂ මූර්තියෙන් ලොව පහළ වී සකල විධ ශිල්ප ශාස්‌ත්‍රයන්ද, විද්‍යාවන්ද ලොවට පහළ කරවා ධර්ම ශාස්‌ත්‍රයන් ප්‍රගුණ කිරීමේ නැණ නුවණ සාධු ජනයා වෙත දානය කර ලෞකික සත්‍යයද ලෝකෝත්තර සත්‍යයද අවබෝධ කර ගැනීමේ ඥනය ලබා දෙන බැව් සත්‍යවාදී සැබෑ වී නම්,
නෘත්‍ය ගණේෂ මූර්තියෙන් මෙම කලියුගයේ දී ඔබ දිව්‍ය රාජෝත්තමයාණන් වහන්සේ ලොව පහළව සූ සැට කලා ශිල්පයන් ලොව පහළ කොට පෘථිවි තලය සුන්දර කරනු රිසියෙන් සකල ලෝක සත්ත්වයා වෙත නෘත්‍ය ගීත වාදිතාදී සකල කලාවන් ප්‍රගුණ කිරීමේ ප්‍රඥව දෙවා වදාරන බැව් සත්‍යවාදී සැබෑ වී නම්,
ඔබ දෙවි හාමුදුරුවන් වහන්සේට ගඳින් මලින් පහනින් රසෝපේත අත්‍යලංකාර අහාර පූජාවෙන්, පලතුරු පූජාවෙන් උපහාර දක්‌වා මේ ආතුර ශ්‍රී පාත්‍රයන් විසින් ඔබේ පාද මූලයෙහි වැඳ වැටී පතා සිටින්නා වූ සියලු සුබ අභිප්‍රායයන් ඉෂ්ට සිද්ධ කරවා දී ධන ධාන්‍යයෙන් ආඪ්‍ය කරවා දී රෝග බය, අමනුෂ්‍ය බය, දුර්භික්‌ෂ බය තුරන් කරවා දී නැණ නුවණ දියුණු කරවා දී බිළිඳු දරුවන් ආරක්‍ෂා කරවා දී දරු සම්පත් වර්ධනය කරවා දී සප්ත සම්පත්තිය පහළ කරවා දී දෙවි දොaෂ, ඇස්‌වහ කටවහ, අඩෝ වැඩියා දොaෂ නිවාරණය කරවා දී සකල ඓශ්චර්යයත්, සර්ව සෞභාග්‍යයත් දානය කරවා ඉෂ්ටාර්ථ සිද්ධිය සලසා දෙන්නට ශ්‍රී ගණපති දිව්‍ය රාජෝත්තමයාණන් වහන්ස ඔබ වහන්සේගේ කීර්ති නාමයට ඇඳිලි බැඳ වැඳ වැටී මා ආරක්‍ෂා කරවාදී වැඩ වදාරන සේක්‌වා.
